Samoa's Short Story Contest - Second Story

“Mitiafu Fou Masaesae” - Tusia e LV Letalu 

I se tasi taeao sesegi lava, oute ala ifo, o la oute ta’oto i le ‘autu. Na mafua ona ou te’i ona ua pisi mai se vaivai i le pasi ane a le pikiapu a Loma e alu i tai i le alatele, e aga’i atu ai i Apia. Sa ou faalogoina le palapalā o o’u foliga ma le susū o o’u ‘ofu. Sa ‘ou faalogoina fo’i le fe’alasi o lo’u fatafata, ma se fula i le tua o lo’u ulu. Ua sui fo’i la’u faalogo. Ua nenefu la’u va’ai ma lē o manino lelei lo’u mafaufau. O lea na ou matuā le manatuaina ai pe na faapefea ona ‘ou i’u ane ma ‘ou moe i le ‘autu lea. O lo’u mitiafu lea e ‘ofu, e fou, e le’i leva na aumai i le isi a’u uō mai Pago, ae ua masaesae uma luma ae maise le ulu ma foliga o Bob Marley. Talofa e, ia Bob ua te’i ua tigāina fua ae poo le a sana agasala. Ua ou mānumānu fo’i i lo’u mitiafu oute tiu ai i a matou evaga ma tafaoga. E mo’omo’o uma fo’i iai le matou tupulaga o teine ma tama. 

Sa ou āutilo poo iai nisi ua feala o le itūala uta, ae leai na o ta’ifau a aiga i tafatafa ane, lea e feoa’i ma sasalu mai o latou vae aga’i i le mea lea oute iai. Na oso lo’u masalosalo pe na papatiso a’u e maile nei, o lea na ou sogisogi ai i o’u lavalava pe na o se susū mai i le vaivai pe leai, ae ua tau le lelei fo’i le sogisogi, ai ua mapeva fo’i le isu latou. Ua solo atoa manogi uma i la’u sogi. “Pei e mālie koe makagā legei kulaga ua ‘ou iai,” o nai o’u mafaufauga nei, ma ou tu loa i luga ma ou telea’i loa i le matou aiga semanū e le’i feala le matou nu’u. O le a faatali fo’i iloiloga o ni manu’a se’i o’o i le fale. Sa ou tolotolo lemū e pei o se gaoi ina ua ou taunu’u i le matou aiga, ma o lo’o momoe pea o’u matua o Pesa ma Losa ma lo’u tuafafine o Tasi. Sa tatala lo’u mitiafu ma ou tago momono i le ogātotonu o le faaputuga tagāmea lea e i lalo o le paipa. Sa ou faanoanoa i lo’u mitiafu ma ou faapea ane, atonu lava e mafai ona toe fonofono ona masaesae e lo’u tinā, ae le tiā’ia. A le o lena fo’i e ‘ofu masaesae ai pea e pei o nisi fo’i o sikaili fou ua a’e mai o ‘ofuvae ma mitiafu ae faamasaesae. O lona uiga, pe masaesae pe leai, “everything’s gonna be alright” pei ona pese ai Bob. Sa ou ‘ata’ata lemū ma sui lo’u ‘ie lavalava ma amata ona iloilo o’u manu’a. O lo’u fatafata e feagai ma le vaega o le mitiafu lea sa iai le ata o Bob, ua ma’osiosia uma pei na fela’u e ni maiu’u o se manu fe’ai. 

Ua amata ona ‘io’io a matou pua’a ma moa i tafatafa o le umukuka e pei ona masani ai i taeao ta’itasi. Sa ‘ou alu atu ma sali iai popo ma sasa’a iai le penu mai i le niu o le saka ananafi, lea ua uma na fa’asusū. Sa ou te’i i le faapea mai o le tala a Losa, “Makuā e ala po.” Sa leai sa’u tali, ae na toe faapea mai lo’u tinā, “A’o fea sa e moe ai agapo? Ga e moe i le falemoe?” E le’i uma lelei le fesili a Losa, ae apakaki e la’u tali “Ioe.” I le taimi lea, ua amata ona fai nai a’u gaioiga e nanā a’i o’u manu’a mai lo’u tinā, ae maise o lea oute fa’asausau. A ui ane i o’u luma Losa, ua ū iai lo’u tua ina ne’i iloa o’u maosiosia, ona faatagā valu lea o lo’u tuāulu e pupuni ai e lo’u lima le fula. 

Ua savali Losa aga’i i le paipa, o’u tamo’e loa tui lo’u ofutino. Ua oso le popole ia te a’u pe a te’i ua va’ai Losa i lo’u mitiafu masaesae. Ua faasolosolo malie ona tau malamalama lo’u mafaufau ma ‘ou manatuaina nisi o mea na tutupu i le po ua mavae. Ua ou manatuaina se sapelu ‘au uga e matuā i’ila i le pogisā lona ma’ai. Na ou manatua fo’i se tama’ita’i pa’epa’emā, ae le o se palagi. E lē matuā ‘aulelei tele fo’i - e fai si o’omo o ona mata ma lona isu e mafolafola toe pi’o pei na soli e se kekapila. Sa ou toe taumafai pea oute manatua nisi mea, ae te’i ua oso ane le ata o se tamāloa mata sāuā toe ulupo’o, pei o Kojak. Ae pau fo’i le tagata ulupo’o mata sāuā o le matou nu’u, na o Mika. Ua moei’ini o’u mata ma ou taumafai lava e tuufaatasi mea uma nei ua ou manatuaina, ae ua avea ma mea e oso ai le tigā o le fula o lo’u ulu. A’o tau o’ono o’u tigā, sa te’i lava ua fesili mai se isi, i se leo fo’i oute masani ai. “Kipa, sole, ga maua ea oe e maile i kūliga agapo?” E feauga lo’u pupula atu ae nofo ifo i lalo Sefo. “O a kūliga?” o la’u tali atu lea, ae faapea mai le tala a Sefo, “Sole ua ‘ou laki o le vai’eli. O’u lāvea a i le ‘alā o’u kofu i le vaieli. E laki fo’i o le sua kuku’i o le vai’eli. Va’ai lea e ugo’oa uma lo’u ikū.” Ua te’i lava ua ou manatuaina atoa le mea na tupu ina ua faamata’osi mai e Sefo. 

E le’i pine ae savali mai Losa mai le paipa aga’i mai i le umukuka lea ma te nofonofo ai ma Sefo. Ae fetaui fo’i ma le taunu’u mai o le tama faitatala lea o Fala ma faataiō mai lana fesili, “Sole, o fea ga lua momoe ai agapo? Fiu fo’i e fa’akali oukou i le falemoe ali’i.” Na vave atu la’u faasalapu ia Fala leaga o lea ua o’o mai Losa, toe me’i ai ma le fesili a Fala ae fai lana tala sisi’o, “Uso o la’u kala fo’i. Ga ‘ou oso mai i kalage o le fale o Lasela. Oka se pa’epa’emā o le keige pei se pālagi, ae ga alu pei se ‘ulo.” Ua faapea atu le tala a Sefo, “Fala, se a va’ai ifo e kikaka ‘aua le ula i le ‘ulo.” Ua fai pea le matou taliēga, ae ua faasolo nei i lo’u mafaufau pei se ata tifaga mea uma na tutupu na mafua ai ona ‘ou moe i le ‘autu. 

Fai ma sa matou nofonofo ma Sefo ma Poe i le ‘auala i luma o le fale o Mika ma nisi o aiga lata ane i le malae, ma fai ai le matou faa’ili e pei ona masani ai i le tele o po. O le to’atele fo’i o le matou tupulaga, lea ua miomiō solo i lumāfale o Mika ona o Lasela lona afafine lea faato’ā sau mai Niu Sila. Ua faasolo ina leva le afiafi, ua lata fo’i ina tā’ape le matou evaga. Ae i totonu o le fale o Mika i le taimi lea, o lo’o nofo Lasela i talane o le faamalama ma fai ai lana Facebook i lana telefoni, ia ma pu’e ana selefī. I tafatafa ane o Lasela o lo’o fai ai le ‘aki a nai ona tei laiti i ni tama’i ma’a. Ua fiti nei leisi ma’a ma tau i le vae o Lasela. Ua te’i le teine ma oso ua faataiō ma faapea lana vala’au iā Mika, “Dedi, ua frow mai rocks a kama iā a’u.” Ua lagona mai e Mika le faataiō a Lasela, “O le a lau kala Lasela?” Tali atu le teine, “Ua kogi mai ma’a a kama iā a’u.” Toe fesili ane Mika, “O ai kama?” Ua tali atu Lasela, “Kama lae kukū mai i le modoway.” Ua toe fesili Mika, “I le a? I le aualakele?” 

"Se ioe dedi.” 

Ua matou va’ai atu ua tago Mika i le sapelu ma vala’au i ana maile o Koki ma Kiko ma savali mai i le mea lea matou te iai. O lea ua matou tutū faasaga i le malamalama o le molī o le fale o Mika ma ua tau maitau mai o matou foliga, ae le’i matuā iloa lelei matou e le ulupo’o. A’o maile ua pasi nei Sefo ma Poe, ae aga’i tonu mai ia te a’u, peisea’ī o lea e ia te a’u se tufa’aga fasi povi mata. Matou laga loa ma taufetuli aga’i i le pogisa. Ua fai nei tuliga a Mika ma Sefo ma Poe, a’o Koki ma Kiko, lea ua e’eli mai o la vae i o’u tua. Na ‘ou faalogoina fo’i le gu ‘ava’avau ma le ‘atigū o nifo o maile i le fia maua o a’u ae o lo’o o’u tamo’e autago pea i luga o le ‘auala pogisa. Na te’i ua segaia o’u mata i molī o se ta’avale o lo’o aga’i mai i o’u luma, o’u oso loa i le ‘autafa o le ‘auala, e pei o la ‘oute oso i se vai. Na gata ai ma lo’u iloa o nisi mea na tutupu se’ia o’o i le taeao. 

 O lea la ua fai nei a matou taliēga ma Sefo ma Fala i ā matou tūliga ma Mika, ma matou tu’ufesili pea pe aiseā na tuli tatao ai a’u e maile, ae tu’u Poe ma Sefo. Na o le ‘atage’a lava o Fala ma fai ana tala ula ma taufa’alili iā te a’u, “Ae ‘ai ga ‘ai sau elegi agapō ua e lala’oa ai ma fia ‘aai maile ia ‘oe.” Fai atu la’u tala ia Fala, “Ia ula a iai, se’i e o’o iai ga faako’ā e iloa lea.” Ae ua atili ai na malomaloā le ‘ata a Fala ma faapea mai, “Ae akili fo’i ua kuli e maile le kamela.” 

E le’i umi ae matou va’ai atu ua savali mai Mose, o se tasi o le matou falemoe. O Mose e le’i leva na sau mai Ausetalia sa nofo ai mo ni nai tausaga. E faaigoa fo’i e le matou nu’u o Popu Mali ona o le mata’ina o lana ‘ava ma lona lauulu u’umi ma ana fili ta’ai tavi’ovi’o. “Se mālō Popu!” o se matou faafeiloa’i faatasi atu lea ia Mose. Sa tali mai Mose i lana fa’a-Samoa-ua-tau-galo, “Malo li’i, le a mea e ‘aka ai oukou?” O le taimi lea ua le toe pē fo’i ma le leitiō a Fala, “O lea e ‘aka makou i kūliga a Mika ma le auali’i ia agapō.” Ae tali mai Mose, “Ia ‘ai fia ō oukou ia Modoway ua ika ai kama ulupo’o.” Ae toe oso ane fo’i le tala taufaalili a Fala, “Ae koe kasi a le misikelio lea e kokoe, po’o le a le mea ga kuli kakao ai e maile le uso lea ia Kipa.” Faapea mai loa le tala a Mose, “E iloa oukou? O maile a Mika, e ika ia iā a’u kalu ga sau a’u mai Ausekalia. E maga’o a e bite a’u. Ai a va’ai i sa’u aka, ai e bite fo’i.” Sa faafuase’i ona pei e ‘ila i lo’u mafaufau le pogai tonu o le tuli tatao o a’u e maile. Poo faapea Koki ma Kiko o se ata o Mose lea nai lo’u mitiafu, ae maise e le’i vaai tino maile ia Bob Marley na o Mose. Ua na’o se masalo. Ua toe oso ane fo’i le leitiō a Fala, “O maile ga o le laka ia iā a’u, dei luv me man. Ouke alu so’o a i le fale o Mika e lē kulia a’u; koeikiiki fo’i o’u alu e fesoasoagi i le ulupo’o e ako laga umukuka.” 

Ua faapea mai ma le tala tausua a Sefo, “Sa’o la, e le bite e maile ia Fala, laga e love iai maile, loga uiga e le bite mo’i ga o le love bite.” Ua matou taliē nei ma Sefo ma Mose, ae ua foliga ua tau ita Fala faitatala. 

Ua faasolo nei ina tauafiafi, ua toe nei o ma’ua ma Fala, ua ō Sefo ma Mose. Sa te’i lava ua vala’au mai Tasi i lumāfale ma sisi i luga se ‘ofu, “Kipa, va’ai, magaia lou mikiafu fou mai i Giu Sila ia Masi.” O’u vaai atu, oka se manaia o le ata telē o Bob Marley e aofia ai luma atoa o le mitiafu. 

“O ai ga sau ma ia?” O la’u vala’au atu lea i lo’u tuafafine. 

“O le kakou afīfī ga sau ma Lasela. Sau e avaku lou mikiafu e fa’aka’ika’i.” 

O’u la’a atu loa ‘aumai le mitiafu ae fa’apea mai le tala a Fala, “Oka se magaia o lou mikiafu uso. Seki a ‘oe.” Ua ou manatua vave ai le upu, “o le momo’o, o le ‘aisi fo’i lenā.” O’u tago loa togi atu ia Fala le mitiafu ma ou fai atu, “Ia kago e faaka’ika’i pe ofi.” Sa matuā fetaui lelei le mitiafu. Sa faapea mai le tala a Fala, “Ae aiseā o le a foa’i ai lou mikiafu uso?” ‘Ou tali atu, “Oe, se ‘ofu. E kakau ga fai sou ‘ofu magaia o legā e ke alu i le fale o Lasela e ako le lakou umukuka. E leiloa pe fai gei gi lua kūliga ma Modoway.” Ua faato’ā manatua ai fo’i e Fala le umukuka a Mika ma faapea mai, “Sole, so’u alu ai o faakali mai Mika.” 

E le’i leva a na alu Fala ae ou faalogo atu ua faataiō mai le tagata, “Auooooi, ka fia ooola!” E le’i umi ae pefu ane Fala i luma o le matou fale ma fa’ataiō pea, ma si ona mitiafu fou, ua masaesae uma. Ua toe fo’i Koki ma Kiko i le vala’au ane a Mika, ae ua futi pea le malafoni a Fala. Na ‘ou faapea lemū ifo, “A lē moe aku i le falemoe gagei, loga uiga la e moe i le ‘auku.”