Motuga'afa - (Cultural Tidbits)

O lenei itulau (page), e faamoemoe e tusia ai nisi o motuga’afa (alagaupu, faamatalaga, upu ma o latou uiga, ma nisi mea faapena) mai i le gagana, aganu’u, faapea tu ma agaifanua a Samoa.

I lenei taumafaiga, e mafai ona iai nisi o faamaumauga e le talitonuina ma lagolagoina e nisi o le ‘au faitau ona o nisi o faapogai - e pei o lenei: E iai le upu masani a le atunu’u “ E talalasi Samoa.” O lona uiga e iai nisi o talitonuga e taofi ese’ese iai le atunu’u. Talu ai ona o si o tatou atunu’u sa tele ina tu’ufofoga le tele o ona talatu’u ma talafaasolopito, sa le ‘asa ona iai ni 'ese'esega o upu ma tala ona e tofu lava le tagata ma lona taofi, manatu ma faauigaga. O nisi foi o taimi, sa tuufaasolo faaitu’au nisi o talatu’u.  O lona uiga, sa tele ina suia nisi o tala tuufaasolo e i latou sa gafataulimaina lea faiva i ni faiga faa’au’au i lona nu’u, itumalo ma alalafaga poo aiga fo’i. O lea, e taumafai le tusitala ina ia faaaogaina manatu o loo taatele ma mafuli iai le tofa manino, poto lautele ma suesuega patino.

****************************************************
‘Ula

O le ‘ula (faasolo) o se tasi o vaaiga masani i tagata Samoa, ae maise i taimi o ni faafiafiaga poo ni faatasiga aloa'ia. E tele mea ma fugala'au eseese e su'i ai ‘ula a tagata Samoa.

O le ‘autu ma faapogai o le tele o ‘ula ina ia teuteu ma faamatagofie ai se tagata i ni ona la'ei ma teuga. O le tele fo'i o ‘ula e eseese mea e faaaoga ma e faalagolago i lona faamoemoega. E pei o le ‘ula laufa'i e masani ona faaoga e taulele'a pe afai o lo'o faia lo latou tofi tautua. E faigofie ona fai, e na o le saesae lava pe nuti nuti le laufa'i ia asoa loa. O nisi ‘ula e faaaoga moso'oi manogi pe a faia ni fiafia pe faamanogi ai fo'i la'ei ma faamatagofie atili ai teuga a se tagata. E masani foi ona faaaoga ‘ula manogi nei i taga palolo. O nisi o ‘ula masani ua iai le ‘ula fala e foliga mai ua avea o se ‘ula ua patino i nisi o tagata iloga ma le ‘au mau tofi o le malo, e ui o le ‘ula lea sa tele lava ina ‘ulaina e tulafale poo ali'i fo'i ae maise i o latou faiva faa-faleupolu atoa ma taimi o ni tauaofiaga faale-aganu'u.

Ua iloga fo'i igoa o nisi o ‘ula patino e pei o nei:

Tuipapai – O le igoa lea e ave i le 'ula a le tupu ma se tamali'i
Fa'asolo – O le igoa o le 'ula a tulafale/tulatoa
Tuive'eve'e – O le igoa o le 'ula a le taupou poo se teine
Tinumasalasala – O le igoa lea o le 'ula a le manaia.

Nei te'i ua talanoa nisi e uiga i le tuive'eve'e poo le tuipapai, ona e taumate lea poo le a le uiga o nei upu. Ae ua masani lava tatou e faaaoga le upu "faasolo" e pei o se upu faaaloalo mo soo se ‘ula lava.

O le ‘autu masani lava la o se ‘ula e mo le faamatagofieina, e pei ona iai i nisi nei o alaga'upu

Ua ‘ula le aso - Ua matagofie le aso
Ua tepa i ‘ula tago i ‘ula - Ua matagofie mea uma
Ua maua ‘ula futifuti - O lona uiga ua maua se mea matagofie poo se manuia, ae toe faamele pe faaleaoga ma manatu faatauva'a pe faatalale iai.

Ua fa'aui le 'ula - Ua faae'e le suafa matai e se tama i sona atali'i poo se suli o le aiga, ae maise pe afai ua latalata ina maliu le tama.

"Ua feagai Vini ma Tapaga."
Main meaning:  Ua tatou feiloa’i manuia.

Same as these:
Ua sau nei le vaa na tiu tau mai i le va’a na tau, o lea e mamau lago o le vaa na fao afolau.
Ua faafeagai sega’ula
Ua tatou feiloa’i i luma o le nu’u ae le o tua o le nu’u
Ua taunu’u le faamoemoe
Ua togi i le pa tau i le ‘ave.

E mafai fo’i ona faaaoga i nisi uiga ma faauigaga pei o nei.

1. E ui ina feagai Vini ma Tapaga, ia ae mamao lava fo’i ala.
E faaaoga pe afai i se taimi ua fia tuumuli ma faamavae ona e faapea lea, “Ia o le tonu, e ui lava fo’i e fia feagai pea Vini ma Tapaga, ia ae e fai fo’i si maomao o le matou pitonu’u. O le a matou sosola.”
"E ui ina felataa'i Vini ma Tapaga, ae mamao ala ma auala."

Same as: “E pipi’i tia ae mamao ala."
I aso o faia le faagatama a ali’i (high chiefs) o le seuga lupe sa iai tia seu e fausia i ma’a (stone foundations) e faaaogaina e tutu ai le ‘au seu. O nei tia e felataa’i ma masani ona  pipi’i  le isi tia i le isi, e mafai lava ona talanoa pe fesoota’i le ‘au seu a’o i le tumutumu o tia. Ae afai ae alu se tasi mai i le isi tia i le tia o lo’o soso’o, ia e mamao le ala ma le taamilosaga, o lea la "Pipi’i tia, ae mamao ala."


E faapena Vini ma Tapaga, e felataa’i pe a tu i Tapaga ae tilotilo i Vini, ae a mana’o la e alu i Vini, ia e mamao aua e 'aau pe alu foi i se va'a.

2. Faaaoga i ni upu e tapui ai se va.
Same as:  E ui lava ina ta va faa-faleve’a ma so’o tulutulu, ia ae leaga e popo’e fo’i ona o nisi o tulaga e tusa i lo ta va nonofo.

3. Faaaoga fo’i i se tulaga e afei ma faamasuiga malie, faanofolelei ma faanofomalie ai se talanoaga.
Mo se faata’ita’iga a iai se faalapotopotoga poo se aiga fo’i ua faatasi mo se talanoaga e tau fofo ai se faafitauli, - aua e iai taimi e tafatafafuga (fealofani) ai le mafutaga, ia ae iai foi taimi e tafatafamaogo (le fealofani) ai - ia e mafai ona faatomua sau upu e faapea:

“Ia le tatou aiga, o le mea moni, e ui lava fo’i e feagai pea Vini ma Tapaga, ae e iai lava fo’i aso e sousou ai le sami/vasa o loo i lo la va.  E ui la ina faamata mafana ma fealofani le tatou va nonofo, ia ae iai lava fo’i nai fesoua’iga i nisi o taimi.”

"Lauga" Faafetai i se Faaipoipoga

Here’s an example of a lauga faafetai (“faafetai”) at a typical LDS - or any other - wedding reception in an LDS cultural hall - or other setting. I have tried to present it in a more inclusive approach, and it can be modified to fit a particular occasion, setting or format.

Please note the difference between a “lauga” per se and a “lauga faafetai”, or just “faafetai” especially those delivered in church halls where the ward/congregation is the hosting party and the families responsible for the occasion (wedding, funeral, birthday, etc.) are the visitors/guests.

Certain parts or components of a traditional lauga (e.g. ‘ava, taeao, etc.) are omitted from a “faafetai” so a “faafetai” in occasions and settings cited above should be mentioned and delivered in its proper context. In that way, the “faafetai” will not be misconstrued with a typical “lauga” common among chiefs and orators in traditional settings.

(Note: Fictitious names are used in the sample. O igoa o loo faaaogaina o ni igoa fatu ae le o ni igoa o ni tagata patino.)

O se faafetai a le uarota/aulotu i le aiga e ona le faaipoipoga.

Ua uma le faafetai a le aiga, e aofia ai le faafetai i le epikopo (faife’au) ma le uarota faapea ma le sa faamauina le ulugali’i fou i le malumalu sa. E aofia ai i le faafetai a le aiga e ona le faaipoipoga ni faafitifitiga ma faalalolaloga e tusa ai ma taumafa ma nisi o sauniuniga ma faaaloaloga a aiga.

Ua tula’i le sui o le uarota e tali le faafetai (fetalaiga) ia ma ave fo’i sa latou faafetai i aiga e ona le faaipoipoga. O Lesala sa fai ma fofoga o le ulugali’i fou faapea le mamalu i aiga na lua.

Leo’o:
Ua faafetai ma faamalo saunoa i lau susuga Lesala, o le ua avea ma fofoga o le ulugali’i fou faapea fo’i le pa’ia i aiga-na-lua, ma le mamalu i lena itu o le tatou faatasiga. E faamalo atu i lou fofoga lafolafo ma le fetalaiga faaalualu. O lea ua matamio le maimoaga nai le Laulala ae silamatanonofo le maota o le Tuiaana. O lea ua faafofoga atu le pa’ia o loo e’e nei ma ua se taliga lava e fia faalogo e pei o le fetalaiga i le tauti’aga nai Utumalama le tuleiga ma le vagana. Ua motu fo’i la i le vailiuloa ma le sualiu le atu a le tautai matapalapala, ma ua tau fo’i i moana tau i vasa le tafe a le vai su’e ala i le fetalaiga matagofie.

Ae mapu ane ia i lou to’omau, alala ane i lou fala faasau, se’i o’u liliu ane se’i soalaupule ma se’i faa’une se faamanuiaga ma se tapua’iga a le uarota (aulotu) ia ma nisi fo’i o uarota o loo faatasi mai i le aso.

Ia, le uarota e, leai e le o se faatau, ua faasa mea na iinei i le laumua o le Ekalesia, e leai fo’i se vato’oto’o faale-atunu’u e faia i totonu o falelotu o le Ekalesia lenei, o lea na o na ou talosagaina sa tou faamanuiaga ma le tapua’iga.

Sulimatau
Leo’o, o le a avea ia a’u fai ma sui o le uarota e tuuina atu la matou faamanuiaga ia ma le matou tapua’iga. Alo i ou faiva, ia manuia le faafetai

Leo’o
Faafetai Sulimatau.
Ia le tafafia o uarota, o lena ua iina lea fo’i ua iinei le laumetoenuti ma le faavae o faameomoega faapenei i Utah nei. O le uarota ma lona tapu a uarota. Aumai sa tou faamanuiaga ma la tou tapua’iga.

Masina
Leo’o, alo i le faafetai, ia manuia

Leo’o
Faafetai Masina.

Faulolo
Leo’o, faafetai atu. Na pau lava le tulaga ua faate’ia ai lenei itu, ona o lau saunoaga e leai se va to’oto’o faale-atunuu i totonu o falelotu o le Ekalesia Mamona. Aisea?

Leo’o
Faulolo, faafetai atu. Talu ai ona o le manumanu i le taimi, tau ina ou faapu’upu’u atu faapenei, e le o se faatasiga faale-atunu’u poo se saofa’iga a matai lea e fai. Leai. E le o se nuu poo se itumalo fo’i lea e tauaofia, ae a la e alalala mai le susuga a le epikopo o le pule o le tausama’aga faapea ma nisi o le aufaigaluega a le Atua. Ae e mafai ona ta talanoa na ‘o ta’ua pe a mae’a e famalamalama ai lea tulaga.

Faulolo
Leo’o, o a’u o le Lufilufi, ia ae Leulumoega fo’i pe a lafalafa tuga ...O a’u e...

Leo’o
Faulolo, se malie maia, e pei a ona ou fai atu, se’i fai se saofa’iga a matai ona agatonu lea o lou Lufilufi ma lou Leulumoega. Faatili ou foe faa-faleupolu mo le a’e i maota, laoa ma malae o le atunu’u. O le fanua ma lona tapuafanua. O fanua nei o fanua tau le Atua, ma e tapu foi la e le perisitua.

Faulolo
Leo’o, e puipui e le aganu’u le Tala Lelei....ae ...

Leo’o
Faulolo, e manaia lou manatu, pau o lona, atonu e sa’o ae le a’o. Ae a lena e te saunoa lava iai, e puipui, ae le suitalaga pe suimomo’e pe uluto’oina fo’i e le aganu’u le tala lelei. E mafai lava ona tuto’atasi ma tuma’oti le Tala Lelei, ae maise ai le Ekalesia lenei ... Malie maia ....

Faulolo
Leo’o, tatou auai ia faapea ...

Leo’o
Ia faafetai atu Faulolo

Leo’o (cont’d) ... Ia Lesala, faamalie atu e tusa ai ma le tau numi o le fau poo le tau manunu fo’i o le toau i sa tou faafofoga. O upu masani, e tetele a Pesega ae matua lava i le O’o.

Faafetai
Ae oute le’i su’i tonu le mata o le niu pe faga tonu le malama, e mua’i ona ou faatulou i sa faale Tala Lelei ma pa’ia faale-atunu’u o le aufaigaluega totofi a le Atua, le susuga i le epikopo ma lona ofisa, faapea fo’i le pa’ia i le faamau faaipoipoga, i lo latou faatuna pa’ulia ma le faa-fale tulu’ia. E faatulou foi i le mamalu i uarota ma le loaloa o le auvala’aulia.
O pa’ia o le atunu’u, o le a e’e ia i lagi tapu, ma mautu atu i le usoga o le la matafaioi ma le la fatuaiga tausi. Faatulou atu fo’i i pa’ia i lena itu i aiga-na-lua ae maise le ulugali’i fou. (E mafai ona e faalagi aiga - faalupega o nuu o aiga na lua i le vaega lenei, faatasi ai ma igoa taupou (tama'ta'i faaipoipo) ma manaia (ali'i faaipoipo) pe afai e silafia, e ui lava ina e le tau faia ia faalagiga.)

Ae o le a le tunoa le faiva o le nu’u, o le a le moe fua fo’i Vaatausili i le ana. Ae e avea lo’u leo e fai ma afioga tau momoli i le susuga i le epikopo ma lona ofisa, le fai faaipoipoga ma le mamalu i le uarota ae faapea fo’i le lasilasi o le ‘au vala’aulia, e molimoli atu ma faaleo se faafetai faale lava, ae maise le faaleaua’ataina o le fetalaiga.

Muamua, e avatu sa matou faafetai i le ulugali’i fou ona o lea ua ua togi i le pa tau i le ‘ave e pei o le upu ia Atua ma Sa Asomua. Ua tini tauao le faamoemoe. E le se aso sa faafuaveta, ae o le aso sa fau po fau ao. Sa oulua tulitulimatagau le ufi a Sina, ma o lea ua taulau, ua taunu’u ma ua faatasia oulua i le feagaiga fou o le faaipoipoga e faavavau. Faamalo le usita’i ma le onosa’i. O nei aso ua le moe le fili, ua i so’o se mea lona alofilima tu’i tagata ma ana aafiaga tau faaosooso ma tau lamalama.

Faafetai fo’i i matua ma le mamalu i aiga-na-lua i le faatinoina o o outou faiva faatonutonu folau ma o tou faiva faa-matua moepo. Faafetai i fautuaga ma tima’iga mo le ulugali’i fou i taimi o tafaoga ma faamasaniga. Sa outou le faatamala, pe ‘alo i le ataata o le la’au ona o le alofa i alo ma fanau. Faafetai faamalo atu.

O le itu i le palapala a malo ma le titilavatoa, ia matou te le ma’oona a umu fu’e. Matou te le ufiufi fo’i la faamanugase pe faagalo faai’a i ola lo tou gapatia ma lo tou milomilosia. Faamalo le a’ao malosi. O lea ua tali le sua i auauna a le Atua taumamafa fo’i le mamalu i uarota. ‘ae ua goto uga fo’i le sa o le mamalu i le ‘auvala’aulia. Ua malie la le faga i Lalau ua malie le faga i Pa’au i lo tou masui ma lo tou ma’au

Ua le gata i ta’umafa ae ua e apaapa fo’i i le toga pa’ia, ua tatala ‘ie o auafa ua oia fo’i moegalafo ona o lo tou alofa ma lo tou agalelei. (E mafai - ae le fai a’i - ona faalagi toga a aiga/nuu i le vaega lenei.) Ae tainane fo’i le seleni mamala ua foa’i. Ua to’ele lou pale ua e sa’a faaoti fo’i le utu a le faimea. Se faamalo le faatamali’i, malo le faaeaea. O upu e fai i seuga, ua e togi le seu lagatila, ua e faapulou le tualima, malo faamalo fai o le faiva.

Lesala, o upu masani, e le toe tau faapaleina se tupu, e le toe tau faalae’ia fo’i le maa osofia. Matou te le toe tau selu pe faalalanu atu aua e iloa le tupu i ana aga faa-tupu o le tamali’i fo’i i ana aga faa-tamali’i. Matou te talitonu ua outou faia nei mea uma ona o lo tou silasila i le Atua ma lana galuega. Faafetai i le tautua matavela, faafetai le nofotuavae. Ia alofa le Atua pulepule tetele e toe faatutumu mea ua gaogao, ia faaifo atu faa-fuiniu i le lapalapa o faamanuiaga. Ae manatua ai pea upu silisili, e sili lava manuia o le foa’i nai le talia.

Ona faata’i lea ma sa matou faamatalaga, a sau se taimi ua talamea seu le seuga, seseu foi i fanua le aiga tautai ma le faatamasoali’iga, ia alofa le Atua e faamanuia atu i le ulugali’i fou. Ia fusia le mafutaga i le alofa ae faavae i mataupu moni o le Tala Lelei e pei ona osifeagaiga ai i le aso. Ia fua fo’i le niu, e le gata ina ia malu ma manuia aiga, ae ia sili ona aoga mo le Atua ma lana galuega. Faamanuia fo’i i le paia i aiga-na-lua. Ia mamao ni mala ma ni tuataafalu ae maise i le toe taliu i aiga ma alalafaga. Alofa le Atua e leoleo i magaala, ia malu fo’i peau o le vasa ma le ea i la outou folau ma faaopea.

Liliu mai i lenei itu, ia lagi e mama i le susuga i le epikopo ma lona ofisa faapea foi le susuga i le faamau faaipoipoga ae maise le mamalu o le auvala’aulia.

Ia aua fo’i ne’i solo le fue pe gau le to’oto’o i lau susuga Lesala. Maua pea le mau aua ou faiva faatausivaatele ma ou faiva faa-pola puipui.

Ae tatou taape ia i le taape a le fatuati, e taape nei ae toe ati foi taeao .... ...

Ia soifua ma ia manuia ......

Lesala:
Ua faamalo fekalai Leo’o. Ua leva ona ka fia soso aku a’o folau lou sa, ia ae popo’e le loko iga ge’i e faapea ua ou aleaga pi’iama. O le a le koe kiukalaloaiga fo’i la se upu poo se magaku, ae avaku le mea alofa lea a le ulugalii fou ma lau susuga e faaifo ai lou fofoga ..

Leo’o
Lesala. o le a ta la tasi ia ma ta se’elua i lou sa e pei ona e fetalai. Ae o le meaalofa lea, ua tele le fia tete’e ia ae ne’i e faapea ua ta le faaaloalo, ioe, e fai o faiva o pule, a’o faiva fo’i o faaaloalo ...ae faapegei ....

Lesala
Leo’o, faamolemole kalia le meaalofa a le ulugali’i ... ga e avaku faakakau mo kagaka e ko’alua, ... ia ka fekaui la i fafo pe a uma ....

Leo’o
Lesala, fai mai kala faaoga po gei ...o la’u pesto. E leai fo’i se mea o le a ka koe fekaui ai, ua fekaui so’o fo’i ...ka fekaui kaeao i le loku ..

Lesala
Oi, se faafekai pe a ua e koe alu i le loku ....


***********************************************************
O nisi nei o motuga’afa o faaupuga e faaaoga i se lauga poo ni tautalaga i ni nofoaga ma tulaga aloa’ia.  O faaupuga o loo i lalo, e eseese mea o loo faatatau ma faamafuaina ai, ae e tutusa o latou uiga i lo latou faaaogaina. O le uiga faasafua e tasi o faaupuga nei, o se mea poo se tulaga ua lelei, matagofie ma atoatoa, ma ua le toe tau faailoaina pe faailoina. E masani ona faaaoga pe afai ua atoa pa’ia i se maota/laoa poo se tauaofiaga. O ni faaupuga faavi’ivi’i ma faane’ne’e.
Afai fo’i ua e mana’o e faaeaea ma faavi’ivi’i i se aiga ona ua lelei ma matagofie se taumafataga ma faagasologa uma o se faaipoipoga, se maliu poo se isi lava tulaga, ia e mafai fo’i ona e faaaogaina ai faaupuga nei, ae maise i se faiga faatomua (introductory) mo se vaega o lau faafetai/lauga.


1. E le toe taufaafuluina le sega’ula.
O le sega’ula o se manu e lanu mumu ma matagofie ona fulu.
2. E le toe tau faafuluina le pa sina o le gataifale.
Mafua’aga: Alofaga poo Tuliga Atu/Aku.
O pa (fish lures) e faaaoga e tautai, ae maise i alofaga (tuliga atu/aku), e masani ona fafau faaopoopo iai se fulu (feather) o se manu lele ina ia tosina gofie iai i’a (aku). Ae o le pa sina, e leai se fulu e faaopoopoina iai. O lona i’ila ma lona sinasina ua lava lea e iloa gofie ma tosina iai i’a.
3. E le toe tau faala’eia le ma’a osofia [a le tautai nofova’a].
Mafua’aga: Faiva o le Ta’i Fe’e.
O le ma’a osofia, o le ma’a ta’ife’e (octopus lure). E oso le fe’e ma pipi’i i le ma’a ta’ife’e. O le ma’a ta’ife’e e fafau ma teuteu lelei i ni teuga (la’ei) e faaono tosina gofie iai fe’e. O le ma’a osofia la o le ma’a lea e le tau teuteuina, ae e ‘aina tele.
4. E le toe tau aufagaina le la’au ua uma ona ta tulaga
O se la’au ae maise le niu, ua ta tulaga, o lona uiga ua uma ona ta (notch) ni tulaga e tu ai le vae o le o loo a’e i luga o lea la’au, ma e le toe mana’omia fo’i la se ‘aufaga (nonoaina o vae).
5. E le toe tau sulaina ie memea
O ‘ie memea o ‘ie toga ia e vaivai aua e nini’i le tosiina o le laufala/lau’ie, toe matagofie lona lalagaina, o ‘ie nei e matagofie, e le toe tau sulaina - O le uiga o le upu sula, pe a faaaoga i toga , e aofia ai le talaina o le “gafa” o le toga ma nisi faamatalaga ma ‘ai‘aiuliga e vivi’i ma faane’ene’e ai le toga, atoa ma lona igoa ia poo ai fo’i aiga e ana ma tausia le toga. O nei la mea uma e le tau faia pe afai o le ‘ie toga (‘ie Samoa) o se matua ‘ie vaivai ma le ageagea.


E mafai fo’i e oe lava ona fafau ni au alagaupu e pei o nisi nei o upu na ou faia lava e a’u
- E le toe tau faapaleina se tupu
- E le toe tau faamanogiina le laga’ali ma le moso’oi


Ae ia manatua, e tatau ona logolelei ma ia tonu ma talafeagai lona uiga ma uiga masani.


Faata’ita’iga:
I ni tauaofiaga masani, e mafai ona faaaogaina i se faiga faigofie faapenei:
“O pa’ia ma sa o lo tatou taeao, ia e leai, e le toe tau aufagaina le laau ua uma ona ta tulaga, ae a le afio o tupu ma tamali’i o faletua ma tausi, faapea fo’i le mamalu i le auaigaluega totofi a le Atua....”

*******************
Solo mo si o'u nu'u i mafatiaga o le galulolo

Ua galulu le ele’ele i le malama a’e o le taeao
Sa fememea’i tagata ma taufetuli solo ina ia sao
O nisi sa sulufa’i mamao i mauga ma le togavao
A’o le galu ua ia tuliloa atu ma tulitatao

Sa tau mai faa-i’a o le po, ae faa-manu poia i ofaga
Lo’u nuu ua faatauga ma uiga ‘ese lona faatafunaga
Ua motusia ai fo’i le mafana o le tele o mafutaga
Ae maise i ona pitonuu o Lata ma Lefaga

Le galu ua le fatisisina ae ua fati toto
Ua le taeao ono, ae taeao lua le faamomoiloto
Ua tagi tautala fo’i le teine o Fuluulalimatoto
Aua o lea ua sola nei le fai ae tu’u lona foto

Matautunaa’ai ua afea e le galu mapu’e o le vasa
Ina ua to le alititai ae faatama’i i le atufolasa
Ua tuufesili ai nei pe o se mala poo se sasa
Aue ita e, ua le magagana ae ua na’o le fasafasa

Le Natura ua faapei o se pelu faatauma’ai ona itu
Na te aumaia le fiafia, faapea foi ma le oti tu
O le olaga e fefiloi aso sousou ma aso malu
Ae o le saogalemu ma le filemu e maua lea ia Iesu

O o tatou mafatiaga, o’otiaga ma puapuaga
Ua uma ona Ia onosa’ia, ua uma ona Ia fa’amama
Ua na o Ia lava e pei ona molimau le Tusi Sa
Na te mafai ona faia aua “ua masani foi ma le tiga”

Pe sa i le oneone, sami poo luga fo’i o se la’au
Se tasi e pele o le aiga poo se tasi o le fanau
Ia manatua pea o Ia na mua’i tautau ma faalava’au
Ina ia ta maua le ola tumau ma le faaolataga e faavavau

E ui ina tafafao tama ae iai o latou tupu’aga
Ua lagona fo’i e Fatutoa la’i o lona faasinomaga
Si o’u nu’u e, e pele pea oe i le loto ma le agaga
Tepa ia i mauga ma le lagi mo so ta mapusaga ma toomaga

Falefia o Alii, Maopu, Tootoo, Suafa ma le Tofa i le Matua
Tatou afua le taeao o le Faamoemoe ma le Faatuatua
A pa’u ma to’eleele se fatu, e toe tupu olaola ma toe fua
E faapena si o tatou nuu pe a ‘au pea ma le Atua