2/27/17

O La'u Tala Malie - Ae Moni... (Updated)


O la’u tala mālie, ae moni, e le o se taufa’ase’e 😜
‘Aua la ne’i e to’atama’i, pe ete ita, pe ete  te’e
O le upu masani, “a ofi loa le se’evae, ia se’e,”
Afai fo’i e ulufale atu le faitioga, ia "Ulufale gāe’e!"

O le a ou le tāea isi ituaiga, lanu ma atunu’u
Ae e faapito la’u faaseā i o’u lava tagataānu’u
Ae maise nisi o le matou lava fatafaitaulaga ⛪
E le a'afia tele ai nisi o tapua’iga i la’u faamatalaga

O la’u matā’upu e faatatau i epikopo ma fesoasoani
Ona o se tulaga e foliga ua avea ma amio ma masani
Peiseaī e tuua’iina i nisi taimi le ta aganu’u o se mafua’aga
Mo le tou mapo vi’iga ma mamalu o le olaga ma le soifuaga

E ‘ese isi ekalesia i ō latou faafeagaiga taulagi
Ua faaofi i latou i fono a nu’u ma ua faalagi
O ni tamā o matāgaluega ma āo fo'i o faalupega
Atonu e aofia ai ma outou, peita’i e iai se 'ese'esega

E tulaga ‘ese ma tuma’oti le Ekalesia Mamona
E tuto’atasi ma e manino fo’i lana misiona
Afai ae avatu ia te oe se tofiga poo se vala’auga
E le avea ai oe o se sifi, poo se tupu ae o se ‘au’auna

Ua foliga ua su’e nisi o ō outou mamalu ma vi’iga
E ala atu i ō outou  vala’auga ma tofiga
E ao lava ona outou matuā faafetai i le Ekalesia
Ua mafai ai ona avea outou o ni “tagata āloa’ia” 👮

O nisi ua suamalie le ta’i atu o le sua ma le teutusi
E tu’u atu loa i lou lima ae pei o le fela’u a le pusi 😹
O’o i le fale faitau pepa ta’i selau ua pei o sou totogi
Ma e fai i le tinā: “O le tali lea o a ta tatalo ma anapogi.” 🙏

Pagā lea ua avatu fo’i le lole, folo, ae le mitimiti
Ua amata na e fia siou ma fai nai au togafiti 😝
Ua e taulagi ma lāulāuvivilu na tofi oe i musumusuga
Ae manatua e iai fo’i nisi e tofi i faasusususuga

O le isi fo 'i e tū loa i le tofi mau'oloa loa
Faafuase'i ona anoanoa'i ana tupe ma 'oa💰
Va'ai ne'i faauiga sesē le avea ma tausi tupe a le uārota
Amata loa ona e faimalaga so'o pe faafou lou maota

Ina ne'i e faapea ane fo'i e lē molia oe e le Ekalesia
E le a'afia pe aiā mai fo'i le tulafono i si ou fiafia😄
Ae ia manatua le isi upu masani "E tuai ae fāi mai!"
A le o'o mai i aso o lou malosi, e o'o mai i aso o lou vāivāi.

O nisi fo’i e tofi loa e le toe su’esu’e ma a’oa’o 📜
Ona o le tofiga ua e faapea ai o ou manatu uma ua sa’o
Ua avea ai ma auala e sesē ai nisi o fa’ai’uga e fai
Si'omaga loa faapea "o se musumusuga a le Agaga na o’o mai." 👼

E ao ona outou faata’ita’i i le tupu amiotonu o Peniamina
E mata’u i le Atua, alofa i tagata ma tagi i ona lava lima 💪
Ae le na o le faamāepaepa, faamamapo ma faamaopo
Ma faapea ane ona o oe o se fesoasoani poo se epikopo

Sa’ili e galue ma tausi i lou lava āiga ma le atoatoa 👍
Ae le o le tuli o le tinā e faigaluega faasoloatoa 👵
Ae e nofonofo, talitaliaga ma e ta’oto’oto
E iloa ai lou lē faamaoni, lē poto ma lou faalōlōto

I le ma lenei ‘alo ‘ese mai i le isuisu ma le losilosi 👃
O le finagalo o le Atua e ala i faaāliga ae le o le faamalosi
‘Aua le mōli mea ‘ai pe faia nisi vāivāiga poo faatōsina 💋
Ma le faamoemoe e maua ai le tofiga o loo e su’eina

O auala na ma faiga a le tiapolo poo le tevolo 👿
E suamalie mo sina taimi ae o’ona e pei o se tipolo
Manatua e le faapea a ē epikopo ua e sao i le lagi tuatolu
Te’i ua e mao sāsālu ae uma ifo ua ‘ave oe e te nofo i Upolu

Galue faamaoni, ‘au’auna ma tausiniō i mea silisili o le malō ✌
Ma ‘aua e te ita pe lē fiafia pe a o’o ina faamalōlō
Toe faamanatu atu o le Ekalesia Mamona e tuma’oti
O le tele o ona tofiga e mo sina vaitaimi, ae lē tu’u oti 💀

++++++++++++++

Ae ui i lea, ia e pule lava le kama a le loomakua🙎
Kau iga ia magakua o oe o se kagaka e le o se akua🙏 ....Hahahaaaa

Link to my reply to Unknown in the comments below.

7 comments:

  1. Sinatulauta04 May, 2017

    The truth in its hilarious rendition. This is exactly my thoughts and feelings but you said it best. Fa'afetai fa'asoa!

    ReplyDelete
    Replies
    1. Hahaa there are some good epikopo and fesoasoani out there but I've seen enough deviants to call this malady out both in Samoa and abroad including this neck of the woods. E lavea ai foi ma isi peresetene o siteiki i Samoa. Saaad!!

      Delete
    2. Sinatulauta24 May, 2017

      I would love to read out loud your poem at one of our FHEs just for laughs and giggles. Ou te talitonu o le to'atele o e mau tofiga i totonu o le Talalelei e agasala uma i lea tulaga. This would be a great reminder in our home that a calling in the Church is a service, and not a position of social (cultural) status to receive praise and money.

      Delete
    3. Faaikalia a 'oe but I'm worried ke'i ua fasi kele ika e gi epikopo ma lakou fesoasoagi...'ave ma ka ika i le falema'i 🤕🤕 hahaaa. Malo lava!

      Delete
  2. Im a memeber myself.. E manaia feololo lou finagalo pau lona ole Auala oloo e faaaogaina atonu e le talafeagai ona oloo sa'ausi le maimoaga male faafofoaga ale Lalolagi A'o e faasoa i mataupu e fai si maaleale ona o Epikopo o tatou faifeau o ao fo'i latou o faalupega.. Ole upu ua masani ai le Atunuu"A le malu i fale e le malu fo'i i fafo" Aua le faatasinaina Suafa ole Ekalesia i luga ole Upega fesoota'i ale lalolagi.. E le aoa'ia ele matapia le manaia ae ua na o sina tuualalo ma lo'u agaga faaaloalo lava.. Faamanuia and God Bless..

    ReplyDelete
    Replies
    1. Fa'afetai mo le manatu Unknown. Talu ai e 'umi la'u tali, e faatapula'a le aofa'i o mata'itusi i le Reply section, o le la ua tu'u i le vaega 'autu o le blog. Faafetai.

      Delete
  3. Click the link above (end of post) for my response. Faafetai.

    ReplyDelete